Happy Birthday

多謝各位的祝福.

祝你們幸福快樂 Joanna & Frantisek

萬象

又到濕濕悶悶的春天，
步出家門，
一身籠罩住厚厚的濕氣。

晾曬的衣服要許多天才乾透，
地上有時會冒出小水珠，
可怕。

更可怕的是面油，
不知道為什麼，
面部保濕工作已經做妥當，
在濕度百分之九十九的一天，
面油竟可不停冒出來。

春天跟掉落在地上的樹葉一起發酵，
那種糜爛的發霉氣味真不好受。

再抬頭看看遠處的高樓大廈，
有一半的樓層消失了。

















每逢春天，
屋企對面的大帽山總是躲起來不見人，
有時霧大得厲害，
白霧跟著春風從窗戶撲入來。

不一會，霧散了，
春風變得輕悄悄、柔和，
混和著泥土的氣息、青草的氣味、花的香氣。

今天起來，
春雨細細密密，
像牛毛，像花針，像細絲。

我家的文竹又發新芽，
並又替紫羅蘭分株。

生機處處。

Take Out Comedy

快要成為新娘子的J 星期六邀請我參加一個Comedy Performance.
她介紹的準沒有什麼問題吧。

到了中環依利近街的一個地下室，
滿心疑惑的等待Stand Up Comedy(棟篤笑)的開始。

200坐位無虛席。

用$200買了差不多兩個小時的歡樂，
抵!

Take Out Comedy Club

風繼續吹

三個月前的一天，
一位三十來歲的女人經過店舖，
看見廚窗80cm高的綠檀木觀音雕像，
甚是喜歡。

女人: 這觀音像賣的嗎?
我: 是一位朋友寄賣的，他家中太多木雕像了。
女人: 哦。

她就這樣走了。

一星期後她又來，
在店子前對著觀音像發呆，
不一會走進來。

她問: 賣多少錢呢?
我: 朋友寄賣 $2800，是綠檀木。
她說: 那麼貴，能否減價，$1800可以嗎?
我: $1800是肯定不能吧。朋友要賣這個價錢，
我不能作主，要不我先問他。
幾天後你致電來問問吧。
---------------------------------------------------

又過了一個星期。

電話鈴聲響起。
(為了更傳神，以下將以口語廣播)

"你好，xxx，有咩幫到你?"
"你好，我係上次來睇觀音像果位，
個觀音齊頭價俾我得唔得呀?"
"小姐，我幫你問過物主，佢最多減$300，
$2500已經係最低價。"
"齊頭得啦!" (她仍然堅持)
"小姐，我地幫朋友寄賣咋，人地要哩個價就係啦。"
"咁.....我來睇多一次先啦。"
"OK"

----------------------------------------------------------
不一會，她來了。

"可唔可以睇多一次個像呀?"
"當然可以啦。"
"唔....真係冇得減呀? 齊頭啦。"
"小姐，$2500 係實價啦，朋友唔係等錢用，
佢買返來都唔平架，如果少過$2500佢唔會賣架。"
"不如你再打電話同佢講下啦。"
"好啦好啦, 我再打多次問佢啦"

"喂，阿咩呀，個位小姐問你個觀音像可唔可以再減價。"
"如果少過$2500就算數啦，唔賣啦，放響你地度裝飾。"

"小姐唔好意思，物主話最低$2500。"
"咁我考慮下先啦。"
"OK"

(其實我已經有少少唔耐煩)

------------------------------------------------------------

聖誕節前幾天她又來了。

"唔該，我想問你地收唔收VISA 卡架?"
"收架。"
(口快快唔記得同佢講要收返手續費，
因為我地要俾返現金個朋友)
"咁你地送唔送貨架?"
"吓，我地幫朋友寄賣，唔包送貨喎，
你可以叫搬運公司囉。
不過佛像最好都係親自請返去啦。"
"咁有冇盒架?"
"冇架，不過我地可以幫你用泡泡紙包好入落個紙箱度。"
"好啦唔該，我再考慮下先。"
"拜拜。"

(這已經到了我的極限臨界點，
佢真係好叉煩呀。)

-----------------------------------------------------------------

農曆新年前幾天，她又致電來。

"真係冇得平d啦，現在金融海嘯呀。"
(拜託啦，我想死了)
"小姐，實價了。"
"咁我下午再來啦。"

她又重覆詢問包裝及送貨的問題了。
以下省掉數千字。

-----------------------------------------------------------------

終於到了年初八的今天，
又收到她的電話。

"唔好意思，先前去左旅行，所以冇來。"
(廢話少講，好明顯係大話)

"唔緊要。"
(我都回敬你一句大話)

"我今日下午會來買個觀音，
你可唔可以幫我包好佢呀。"

(其實我同個朋友已經唔係好信佢講既野，
求其講話我今日一個人響舖頭好忙，
唔得閒包個觀音。"

"唔緊要，你準備好d包裝紙，我來幫你手。"
"咁好啦。"

---------------------------------------------------------------

今天下午，她帶了個男工人來搬觀音。
那男的身材瘦削，一身唐衣，活像新馬仔似的。

"你檢查一下個觀音像先啦。"

於是女人交了個像給那新馬仔。
新馬仔如驗屍般仔細檢查，
眉頭一直緊繃著，
說那觀音的木質不好，
不是什麼貴價貨。

"細侄女，你好鍾意咩?
我睇這個觀音$2000都不值，
你送俾我就會要。"

新馬仔對我說: 你好，我姓李，貴姓呀?
"我姓張。"

"張生，你識唔識呀邊個邊個呀?"
"唔識喎。"
"我幫襯過佢買過好多雕像架。
你又識唔識呀邊個邊個呀?"
"都唔識喎。"
"佢都係收藏佛像架。"
"哦，係呀!" (好天真的表情，好假的語氣)

"張生，可唔可以俾把刀我，
我想挖下個像底。"
"吓?!唔好掛，個像唔係我架喎。"

"咁啦，張生，我叫David Lee，
係xx寺既負責人，我間寺有好多佛像Display，
好多Demonstration，
好多都靚過哩個，
你得閒可以來參觀下。
我之前又用巴西既咩叉叉木雕左個神壇，
好靚架。"
(使唔使中英夾雜，最憎哩d Code Mixing，
我地哩d 研究Linguistics 既最 afraid 就係哩d people!)

"哦，係呀?!"

"一係咁啦張生，你打電話俾個物主，
同佢講咩咩寺個David Lee 想同佢買左個觀音，
睇下$2000得唔得啦，
佢知我係邊個架啦。
我地哩d 宗教人買野講緣份。

"我朋友都係普通人，未必識你喎。你係咩Lee話?"
"David Lee"
(我係唔係有d串呢? 但我最憎人用宗教來欺世盜名。)

"不如你現在打電話啦。"

"唔好意思喎，物主而家去左旅行。
唔方便打電話騷擾人地。"

"打過電話搵佢唔到咩?"

(究竟佢明唔明我講咩，唔係搵唔到，
而係唔想騷擾人地，況且我朋友冇去旅行。)

"不如等物主返來我再同佢傾啦，
一係你留低電話，到時我再打俾你啦。)

"細侄女，買野都要講緣份既...咁咁咁...咁咁咁..."
--------------------------------------------------------------

不耐煩原因有以下:
先說個女的
1. 來來回回不下十次，問長問短，為的是要減多$500。
2. 個女人好蠢，理解力甚低，記憶力奇差。
3. 冇品，以為搵個人彈下件貨人地就會平賣。
4. 態度囂張。
5. 買件價值$2500的東西竟然可以擾攘3個多月。

再說個男的
6. 面黃肌瘦，面目可憎。
7. 拋浪頭，拉關係話識邊個邊個。(而家咩年代呀)
8. 講野不中不英，響前高中英文老師面前拋書包。
9. 以為自己好巴瞥，恃住自己係個咩咩寺既負責人，
以為係人見到都要俾面。
10. 滿口掛著宗教，但行為蛇一般的，睇你唔起。
--------------------------------------------------------------

我好想點首張國榮既<風繼續吹>俾佢聽，
唔該佢留心歌詞既第一句。